Fleiri búðarústir finnast á Þingvöllum
Nú hefur komið í ljós að í Biskupsbúð sem hingað til hefur verið talin stærsta búðartóftin á Þingvöllum er ekki ein búð heldur margar. Þetta segir Adolf Friðriksson hjá Fornleifastofnun sem stjórnar fornleifauppgröftinum á Þingvöllum. Hann segir ennfremur að komið sé í ljós að svæðið við Biskupsbúð sé flóknara en það leit út fyrir í fyrstu.
Fornleifafræðingarnir hafa nú þegar grafið fimm eins meters djúpa skurði. Í þeim hafa fundist steinhleðslur og torfveggir á sjö til átta stöðum. Adolf segir að neðstu hleðslurnar séu mjög voldugar, bæði breiðar og stórar. Vegghleðslurnar bendi til að þar hafi staðið margar búðir, jafnvel uppundir tíu, þær dreifist víða og séu frá ýmsum tímum. Hann segir að hafi búðirnar verið svo margar sem nú líti út fyrir þá þýði það að þingstaðurinn hafi verið stærri en menn hafi hingað til talið.
Adolf segir að á næstu dögum liggi fyrir að grafa á árbakkanum austan Öxarár milli biskupsbúðar og Flosagjár því að þar votti fyrir búðum á a.m.k. fjórum stöðum. Það kynni einnig að staðfest grun um fleiri búðarrústir. Þetta miði að því að átta sig á hversu langt búðarþyrping þinghelgarinnar náði og hversu margar búðirnar hafi verið austan árinnar.
Gjóskulögin í skurðinum, sem geta sagt til um aldur búðanna, verða rannsökuð af sérfræðingi frá Háskóla Íslands nú í vikunni. Adolf segir að til séu fleiri aðferðir við að finna út aldur búðanna. Hægt sé að taka viðarkolasýni og láta rannsaka þau en fyrst eigi að láta reyna á hvort gjóskulögin geti sagt til um aldur þeirra.
Nú við upphaf seinni vikunnar í uppgreftrinum á Þingvöllum segist Adolf vera hæstánægður; við fornleifauppgröftinn hafi nú þegar komið fleiri og betur varðveittar minjar í ljós en hann hefði þorað að vona í upphafi.
