Rannsóknaráætlun

Áætlunin gerir ráð fyrir að rannsakaðar verði heimildir um þingstaði og þinghald til forna. Alþingisstaðurinn verður mældur upp, ástand minja á þingstaðnum verður kannað og af honum verður gert stafrænt kort.  Með hjálp nútímatækni verður unnið að því að varpa nýju ljósi á þinghald til forna, leitað verður að mannvistarleifum sem ekki sjást á yfirborði með jarðsjá. Grafið verður á völdum stöðum svo lítið  rask verði á sjálfum þingstaðnum.  Rannsóknarskurðir frá 1879 á þingstaðnum og Spönginni og skurðir eftir veitulagnir frá 1957 við austurbakka Öxarár verða grafnir upp. Þegar árangur yfirborðsathugana liggja fyrir verða önnur uppgraftrarsvæði valin, þau kortlögð í heild og rannsökuð að hluta með uppgreftri. 

Vorið 2002 var  gerð forkönnun á Þingvöllum sem stóð yfir í tvær vikur, 3.-14. júní. Næstu fjögur sumur verður grafið í átta vikur á hverju sumri. Gert er ráð fyrir því að um 10 manns muni starfa við uppgröftinn á hverju sumri og tveir til þrír við úrvinnslu og undirbúning allt árið.

Þótt nú verði lögð áhersla á að rannsaka þingstaðinn þá telja vísindamenn að margt fleira beri að rannsaka á Þingvöllum. Til dæmis telja þeir áhugavert að rannsaka fornleifar í Þingvallatúni, þ.e.a.s. við Þingvallabæ og við kirkjuna, slík rannsókn gæti til dæmis leitt í ljós eldri kirkjugrunna Þingvallakirkju.  Þá telja vísindamenn að vert sé að rannsaka ástand minja á svæðinu, kanna rof í tóftarbrotum eða skemmdir vegna trjáræktar. Einnig telja þeir nauðsynlegt að skrá Þingvallaland í heild og kortleggja þannig allar minjar. Það komi sér vel þegar skipuleggja eigi verndun, uppbyggingu og aðra starfsemi í þjóðgarðinum. Slíkar rannsóknir hafa vitanlega vísindalegt gildi og auka á almenna þekkingu á sögu staðarins.