Grafið í Biskupabúð, skammt frá Þingvallakirkju
Biskupabúð er talin stærsta búðatóftin á Þingvöllum. Sigurður Vigfússon fornmenjavörður gróf hana út sumarið 1880 og taldist honum til að hún væri 31,5 x 7,5 metrar að utanmáli. Þústir á yfirborði Biskupshóla benda einnig til að sú mæling gæti verið nærri lagi. Starfsmenn Fornleifastofnunar byrjuðu á því að grafa könnunarskurði í stærstu þústirnar, sem virtust vera gaflar búðarinnar, sunnan- og norðanmegin. Það kom fornleifafræðingunum á óvart að þessar þústir reyndust ekki vera vegghleðslur, heldur aðeins moldarhrúgur, án ummerkja um mannvistarleifar. Hins vegar komu þeir niður á voldugar vegghleðslur þar sem engin merki voru um þær á yfirborði, í nokkurri fjarlægð frá þústunum.
Adolf Friðriksson verkefnisstjóri segir að hleðslur þær sem könnunarskurðirnir leiddu í ljós hafi bæði verið gerðar úr torfi og grjóti og að hluti þeirra gæti verið mjög forn, jafnvel frá fyrstu dögum Alþingis. Á næstunni verður gerð nánari athugun á gjóskulögum og öðrum ummerkjum til að skera úr um aldur rústanna.
Adolf telur óvíst, út frá fyrstu vísbendingum, að um eitt stórt mannvirki eða þingbúð sé að ræða. Undir þetta tekur Howell M. Roberts og telur hann ummerki í norðurenda rústarinnar benda til að vegghleðslur þar séu frá mismunandi tímum. Það er þó von fornleifafræðinganna að frekari rannsóknir og uppgröftur leiði í ljós lítt raskaðar rústir, þannig að hægt verði að komast að því hvernig þingbúðir fornmanna litu út í raun og veru.
