Forn alin og stika á Þingvöllum
Laugardaginn 1.desember var upplýsingaskilti um 
mælingar til forna afhjúpað við Þingvallakirkju. Á upplýsingaskiltinu er einnig álnastika sambærileg þeirri er notuð var til mælinga hér áður fyrr.
Talið er, að upphaflega hafi alin verið lengdin frá olnboga manns fram á fingurgóma, hin náttúrulega alin. Sú alin gat verið breytileg að lengd og því óhentug í verslunarviðskiptum. Því var kvarði markaður á vegg kirkjunnar á Þingvöllum, 20 álna langur.
Við mælingar á vaðmálum, klæðum o. fl. skyldi nota tveggja álna langar stikur. Skyldi stikan vera tíundi hluti 
af hinum lögfesta kvarða.
Það voru SVÞ - Samtök verslunar og þjónustu og Neytendastofa í samstarfi við þjóðgarðinn á Þingvöllum sem útbjuggu skiltið og stikuna en í ár eru 90 ár frá setningu fyrstu laga um löggildingarstofu á Íslandi.
