Þjóðgarðurinn í evrópuverkefni um forna þingstaði.
Þjóðgarðurinn á Þingvöllum er meðal 8 aðila af stóru verkefni sem hefur verið samþykkt af Norðurslóðaáætlun Evrópusambandsins (NPP). Meginmarkmið Norðurslóðaáætlunar 2007 – 2013 er að efla atvinnu- efnahags- og félagslega samvinnu svæða og landa á norðurslóðum með samstarfsverkefnum yfir landamæri á milli einstaklinga, fyrirtækja og stofnana.
Markmið með verkefninu er að kynna sögu þingstaða frá víkingatímanum. Aðilar að verkefninu eru frá Skotlandi, Orkneyjum, Hjaltlandseyjum, Færeyjum, Noregi og eyjunni Mön. Nafn verkefnisins er: The THING Project - Thing Site International Networking Group og er heildarverkefnaáætlunin upp á tæplega 1. milljón evra. Grunnhugmynd verkefnisins er að efla og auka þekkingu á sögu þingstaða, hvernig hægt er að kynna hana og hvernig megi efla ferðaþjónustu tengda þessum stöðum. Verkefnið byggir á þeim þingstöðum sem kunnir eru frá víkingatímanum og eru dreifðir um þau landssvæði sem víkingar námu og byggðu.
Í Skotlandi er Dingwall þekkt örnefni á tveimur stöðum og á eyjunni Mön í Írlandshafi eru lög enn sögð við hátíðlega athöfn hvert sumar á stað sem heitir Tynwall. Í Færeyjum stendur stjórnarsetur eyjanna á Tinganesi þeim stað í Þórshöfn, þar sem þing voru háð um aldir. Í Orkneyjum og Hjaltlandseyjum eru örnefni og sagnir um forna þingstaði. Lög Gulaþings eru sögð fyrirmynd fyrstu laga á Alþingi Íslendinga á Þingvöllum árið 930. Talið er að Gulaþing hafi verið í bænum Eyvindvik nyrst í sveitarfélaginu Gulen norðan við Bergen á vesturströnd Noregs.
Þingstaðaverkefnið er mjög stórt og opnar á tengingar milli þeirra landa þar sem þingstaðir voru. Þar fyrir utan opnast miklir möguleikar til að draga fram sögu héraðsþingstaða á Íslandi, kynna þá og þróa fjölbreyttari ferðaþjónustu í tengslum við þá.
Föstudaginn 4.september verður haldin ráðstefna í Hátíðarsal Snorrastofu í Reykholti undir yfirskriftinni: ÞING-THING sites - A shared hidden heritage. Það er fyrsta ráðstefnan innan þessa verkefnis en í kjölfar hennar munu aðilar verkefnisins halda vinnufund á laugardag og sunnudag.
Á ráðstefnunni munu 8 kunnir fræðimenn fjalla um þingstaði og þinghald til forna út frá mismunandi sjónarhornum. Fjallað verður um lög og lagasetningu á þjóðveldistímanum, þingstaði í bókmenntum og örnefni tengd þeim. Einnig verða erindi um fornleifafræði þingstaða og hvernig megi kynna slíkan arf.
Ráðstefna um forna þingstaði við N-Atlantshaf
haldin í Hátíðarsal Snorrastofu í Reykholti 4. september kl.10:00-17:00
Dagskrá:
09:30–10:00 Skráning
10:00-10:20 Opnunarávarp
Björn Bjarnason fyrrverandi ráðherra
10:25 -10:55 Written records on the Icelandic Althing. Gunnar Karlsson, prófessor
11:00 -11:25 From Iðavöllur to Þingvellir.
On the literary function of the þing. Bergur Þorgeirsson, forstöðumaður Snorrastofu
11:30- 12:00 Assembly features and characteristics - is there a ‘model thing site’? Alexandra Sanmark, fornleifafræðingur
Hádegismatur
13:00 -13:30 Law and legislation in medieval Iceland
Sigurður Líndal, prófessor
13:35 -14:05 From Lawspeaker to Lawbook: Gísli Sigurðsson íslenskufræðingur
14:10- 14:40 Parliament and place-names in Iceland Svavar Sigmundsson íslenskufræðingur
Kaffihlé
15:00- 15:30 Archaeological challenges at assembly sites -Adolf Friðriksson og Garðar Guðmundsson, fornleifafræðingar
15:35-16:05 "Making Archaeology Work at Orkney's Thing sites: archaeology as rural development
Dr Sarah Jane Gibbon og Julie Gibson, fornleifafræðingar
16:05- 17:00 Umræður.
Ráðstefnan er haldin á ensku. Skráningargjald er 5000 kr og innifalinn er hádegisverður og kaffi. Skráning á netfanginu thingvellir@thingvellir.is fyrir kl: 16.00 fimmtudaginn 3.sept.
