Ný salerni og verslunaraðstaða á Hakinu
Glöggir gestir á Hakinu á Þingvöllum hafa tekið eftir tveimur nýjum byggingum vestarlega við bílastæðið og verslun sem opnuð hefur verið í austurenda fræðslumiðstöðvar. Tvö salernishús hafa verið reist með 18 salernum. Nú hafa þegar 9 salerni verið tekin í notkun en þó á eftir að ljúka einföldum frágangi og þegar
líður á haustið verður seinna húsið opnað. Þegar eru 6 salerni fyrir á Hakinu og með viðbótinni má búast við að biðraðir styttist umtalsvert á salernin.
Í austurenda fræðslumiðstöðvar hefur verið sett upp einfalt 
söluborð með nokkrum vinsælum bókatitlum en einnig er þar selt vatn og opnað út úr húsinu til austurs. Bókabúðin í þjónustumiðstöðinni hefur verið mjög vinsæl um árabil af gestum þjóðgarðsins þótt lítil sé enda hefur henni verið vel sinnt og metnaður lagður í val þeirra bóka sem þar er til sölu. Söluhlutinn í austurenda fræðslumiðstöðvarinnar er hluti af verslun þjóðgarðsins og er vilji til að efla hana til að auka tekjur þjóðgarðsins.
