Sögur af urriðatröllum, mannlífi og menningu í Þingvallasveit í síðustu kvöldgöngum sumarsins

Í þriðjudagskvöldgöngu 27.júlí mun Jóhannes Sturlaugsson líffræðingur hjá rannsóknarfyrirtækinu Laxfiskum.ehf fjalla um rannsóknir sínar á urriðanum. Jóhannes hefur um langt árabil stundað rannsóknir á atferli og lífsháttum stórurriðans í Þingvallavatni. Hann mun ræða um lífsferil urriðans og hvaða niðurstöður hann hefur fengið í rannsóknum sínum. Gönguferðin hefst í Vatnskoti kl.20.00 og verður gengið út í Lambhaga.

Í fimmtudagskvöldgöngu 29.júlí mun Margrét Sveinbjörnsdóttir frá Heiðarbæ ræða um mannlíf og menningu í Þingvallasveit á 20. öld í síðustu fimmtudagskvöldgöngu sumarsins á vegum Þjóðgarðsins á Þingvöllum, sem haldin er í samstarfi við Upplit - menningarklasa uppsveita Árnessýslu.

Þá segir Margrét frá því hvernig Þingvellingar þess tíma gerðu sér dagamun þegar þeir litu upp úr amstri hvunndagsins. Má þar nefna saumaklúbbana þar sem karlar og börn jafnt sem konur tóku þátt, símaskák á síðkvöldum, skammlíf ungmennafélög, hrútasýningar, tónlistariðkun og útvarpshlustun í árdaga Ríkisútvarpsins – að ógleymdum hinum rómuðu kvenfélagsböllum í Valhöll. Lagt er upp frá Fræðslumiðstöð á Hakinu kl.20:00 og tekur gangan um 1 1/2 til 2 klst.

Til baka Senda grein Prenta greinina