Veðrið á Þingvöllum 11,4°C NNA 1 m/s.

Nemendur Bláskógaskóla heimsækja Þingvallaurriðann

Nemendur úr 6-7 bekk Bláskógaskóla heimsóttu Þingvelli í dag.  Þar komust þau í návígi við urriðann sem á hverju hausti hrygnir í Öxará.  Þrátt fyrir ísskæni sem myndast hafði síðustu daga ofarlega í ánni þá sást mikill fiskur við brúnna yfir Öxará við Valhöll en þar var íslaust.

Urriðinn var þar í torfum og sýndi nemendunum vel hvernig hrygning fer fram en þeir hafa verið að læra slíkt í haust.  Urriðinn hrygnir í möl og straumvatni og tóku nemendur andköf þegar hrygna og hængur tóku sýnikennslu í hrygningu fyrir framan augun á þeim.

Veðrið var gott og Þingvellir skörtuðu sínu fegursta í leiðsögninni en fræðslufulltrúi þjóðgarðsins tók á móti hópnum.