Veðrið á Þingvöllum 13,4°C SSV 3 m/s.

Þingvallanefnd kaupir þrjá sumarbústaði í Gjábakkalandi

Samningar Þingvallanefndar og LBI hf. um kaup ríkissjóðs á þremur sumarhúsum í landi þjóðgarðsins á Þingvöllum voru undirritaðir 29. apríl s.l. Kaupverð var skv. mati fasteignasala, 34,5 milljónir króna.

Sumarhúsin þrjú, Gjábakkaland 1, 3 og 5, eru þau einu sem standa neðan vegar í landi jarðarinnar Gjábakka á austurbarmi sigdældarinnar við Hrafnagjá. Húsin voru  byggð á árunum 1967 og 1968 og hafa staðið ónotuð síðustu ár. Svæðið hefur mikla sérstöðu innan þjóðgarðsins, landið er tiltölulega ósnortið en skv. stefnumörkun þjóðgarðsins er fyrirhugað að í Gjábakkalandi verði upphaf gönguleiða og miðstöð annarrar útivistar í austanverðum þjóðgarðinum.  

„Þetta er mikilvægur áfangi í uppbyggingu þjóðgarðsins á Þingvöllum og í samræmi við stefnumörkun hans og tilmæli UNESCO“, segir Álfheiður Ingadóttir, formaður nefndarinnar. „Við höfum átt í óformlegum viðræðum um þessi kaup frá 2011. Í fjárlögum 2013 er í 6. gr. heimild til að kaupa jarðir og sumarhús í landi þjóðgarðsins. Nefndin lagði einróma til við forsætisráðuneytið að hún yrði nýtt núna þegar þetta einstaka tækifæri gafst í þeim tilgangi að nýta svæðið til útivistar og náttúruskoðunar.“

Ofan vegar í Gjábakkalandi eru sex sumarhús í einkaeigu. Tvö önnur sumarhúsasvæði eru í þjóðgarðinum; við Valhallarstíg og á Rauðukusunesi í landi Kárastaða. Ekki er heimilt að reisa ný sumarhús í þjóðgarðinum.