Mýrarkrókur
Mýrarkrókur er örnefni í eða við Brúsastaðamýri. Af lýsingum að dæma gæti það hafa átt við krika nyrst í mýrinni milli Brúsastaðabrekkna og Sandhóls.
Mýrarkrókur í frumheimildum
Guðmundur Erlingsson frá Þrándarstöðum, sem ólst upp á Brúsastöðum 1709 til 1737, lýsir landamerkjum uppeldisslóða sinna í bréfi frá 18. öld, sbr. Þingvöllur – alþingisstaðurinn forni eftir Matthías Þórðarson, 1945, bls. 284–285. Þar minnist hann á krika norðaustan Brúsastaðamýrar sem gæti átt við örnefnið Mýrarkrók. Segir svo hér með nútímastafsetningu:
„Búrfellsgil að ofan allt til Kjóavalla. Þaðan yfir þvert í krikann, sem kallaður var, og liggur til landnorðurs af Brúsastaðamýri – eða glöggvara að segja í stein stóran á lágu brekkunni fyrir ofan krikann – og þaðan bein sjónhending eftir endilöngu hrauninu fram á gjána mitt á milli Langastígs og Tæpastígs.“
Ónefndur heimildarmaður segir svo í ódagsettri örnefnaskrá Svartagils:
„Baulufoss (7) rennur úr tjörninni (syðri?), sem er í Mýrarkróki (8). Fossinn er rétt vestan við gömlu réttir. Í Mýrarkrók er hóll, sem nefnist Sandhóll (9). Mýrin er fyrir vestan Grímugil (10). Fyrir ofan mýrina eru Brekkurnar (11). Meðfram þeim, við lækinn, fyrir austan Sandhólinn eru rústir, Grímukot (12). Þaðan var Hörður Grímkelsson.“
Pétur J. Jóhannsson frá Skógarkoti, síðar bóndi í Mjóanesi, merkti Mýrarkrók inn á útprentaða loftmynd á 9. áratug síðustu aldar við núverandi staðsetningu, suðvestan Sandhóls, en einnig norðvestan hans við Grímastaði (64.29135,-21.1310).
Heimildir
Matthías Þórðarson. (1945). Þingvöllur – Alþingisstaðurinn forni. Alþingissögunefnd.
Pétur J. Jóhannsson. (e.d.). Þingvallaþankar og lýsing eyðibýla. Örnefnastofnun Íslands.
Svartagil. (e.d.). [Heimildamaður ókunnur, Guðjón Friðriksson skráði]. Örnefnastofnun Íslands.