Tjaldsvæði þjóðgarðsins á Þingvöllum eru á Leirum, nálægt þjónustumiðstöð þjóðgarðsins og gatnamótum Þingvallavegar, Vallavegar og Uxahryggjavegar.

Gestir velja sér sjálfir staðsetningu innan marka tjaldsvæðanna. Engin sérstök innritun er á tjaldsvæðin, en opnunartími þjónustumiðstöðvarinnar er 09:00–18:00 á sumrin og 09:00–17:00 á veturna. Þau sem mæta á tjaldsvæðin utan opnunartíma eru beðin um að greiða fyrir gistingu á heimasíðu þjóðgarðsins eða í þjónustumiðstöðinni morguninn eftir. Engin sérstök útritun er af tjaldsvæðunum, en miðað er við að gera slíkt fyrir næsta kvöld.

Á tjaldsvæðunum eru salerni og sturtur í sérstökum aðstöðuhúsum, ásamt útivöskum, áningarborðum og aðstöðu fyrir grill. Sturtur eru innifaldar í verðinu en gestir eru beðnir um að fara sparlega með vatnið, þar sem jarðhiti er enginn á svæðinu. Hægt er að tengja húsbíla við rafmagn.

Athugið: Öll tjaldsvæði þjóðgarðsins verða lokuð dagana 19. og 20. júní 2026. Tjaldsvæðin verða nýtt sem bílastæði fyrir tónleika Kaleo á Þingvöllum. Nánari upplýsingar um tónleikana má finna á heimasíðu tónleikanna.

Bóka tjaldsvæði

Tjaldsvæðið á Leirum skiptist í þrjú meginsvæði: Nyrðri-Leira, Syðri-Leira og Fögrubrekku. Þá er fjórða tjaldsvæðið starfrækt í Vatnskoti á sumrin.

Nyrðri-Leirar eru staðsettir við þjónustumiðstöðina norðan Þingvallavegar. Þar er stór grasvöllur ætlaður öllum gistimátum. Ekið er um malarslóða inn á völlinn, þar sem rafmagnstenglar handa húsbílum standa við vegkantinn. Flokkunartunnur eru skammt innar.

Aðstöðuhús er næst þjónustumiðstöðinni með fjórum salernum, tveimur sturtum, áningarborðum og grillaðstöðu. Þar er einnig herbergi með þvottavél og þurrkara, sem ganga fyrir sérstökum myntum sem seldar eru í þjónustumiðstöðinni. Nyrðri-Leirar eru opnir allan ársins hring.

Frá Nyrðri-Leirum liggur gönguleið til norðausturs að eyðibýlinu Hrauntúni.

Syðri-Leirar eru sunnan við Þingvallaveg í nokkurra mínútna göngufjarlægð frá þjónustumiðstöðinni. Þar er aðstöðuhús með fjórum salernum, tveimur sturtum, áningarborðum og grillaðstöðu. Hægt er að sækja sér hreint neysluvatn úr slöngu við aðstöðuhúsið, og skammt norðar eru flokkunartunnur og losun ferðasalerna. Syðri-Leirar eru eingöngu opnir milli 1. júní og 15. september.

Frá Syðri-Leirum liggur gönguleið til suðausturs að eyðibýlinu Skógarkoti.

Fagrabrekka er andspænis Syðri-Leirum upp við samnefnda brekku. Þar er aðstöðuhús með tveimur salernum, útivaski, áningarborði og grillaðstöðu. Fagrabrekka er opin frá 1. júní til 15. september og er eingöngu ætluð tjöldum.

Gönguslóði liggur um Fögrubrekku suður að Þingvöllum og tekur um hálftíma að fara hvora leið.

Vatnskot er eyðibýli við bakka Þingvallavatns í um fimm kílómetra akstursfjarlægð suður frá Leirum. Í Vatnskoti er aðstöðuhús með þremur salernum, grillaðstöðu og áningarborðum, auk tveggja útivaska sem einnig eru nýttir til að slægja silunga úr vatninu. Tjaldsvæðið í Vatnskoti er opið frá 1. júní til 15. september og eingöngu ætlað tjöldum. 

Þingvellir við Öxará eru friðlýstur helgistaður Íslendinga. Öllum er frjálst að fara um og dvelja á Þingvöllum, enda hlíti þeir reglum þjóðgarðsins um góða umgengni.

• Allt lífríki þjóðgarðsins er friðað. Raskið hvergi mannvistar- eða náttúruminjum.
• Hlífið gróðri, kveikið ekki elda.
• Gangið þrifalega um landið, hendið ekki rusli á víðavangi.
• Akið hvorki né leggið bifreiðum utan vega.
• Hundar skulu ætíð hafðir í ól og hirða ber óhreinindi upp eftir þá.
• Víða leynast gjár og sprungur á svæðinu, farið því ávallt varlega, gætið sérstaklega að börnum.
• Gisting er aðeins leyfð á merktum tjaldsvæðum, virðið næturró og gangið hljóðlega um á milli 23:00 og 08:00.
• Veiðileyfi eru seld í þjónustumiðstöð. Óheimilt er að leggja á bátum út frá landi þjóðgarðsins.
• Leitið til landvarða á svæðinu eða í þjónustumiðstöð til aðstoðar eða upplýsinga.
• Þjóðgarðurinn á Þingvöllum er griðastaður. Ölvun veldur ónæði og spillir friði, ölvað fólk getur vænst þess að verða vikið af svæðinu.