Skólaheimsóknir
Skólaheimsóknir til Þingvalla hafa verið vinsælar í gegnum árin. Öll skólastig leggja land undir fót og heimsækja Þingvelli á einhverjum tímapunkti. Þó jafnan sé mest að gera í tengslum við slíkar heimsóknir að vori þá er boðið upp á skólamóttöku árið um kring.
Ekki er tekið gjald fyrir móttöku skólahópa enda liggur metnaður þjóðgarðsins í að fræða nýjar kynslóðir um það sem staðurinn hefur að geyma.
Til eru ákveðnar fastar gönguleiðir með skólahópa en vel er hægt að útfæra hverja móttöku eftir því hvað hentar hverjum hóp fyrir sig og þeim áhersluatriðum sem hentar hverjum skóla fyrir sig.
Gott er að hafa samband í gegnum torfi@thingvellir.is eða thingvellir@thingvellir.is og spyrjast fyrir um móttöku.
** Nú á tímum COVID-19 þá verður vissulega tekið á móti skólahópum. Við munum þó þurfa að hlýta fjöldatakmörkunum hvað varðar fjölda inn í gestastofu og eins munum við reyna að tryggja að skólahópar hittist ekki á, því má gera ráð fyrir að þjóðgarðurinn reyni að hafa ögn meiri tímaramma fyrir hvern skóla**
Móttaka og fræðsla
Tilvist þjóðgarðsins byggist á fræðslu til sem flestra. Þó vissulega séu skólahópar í miklum meirihluta hefur þjóðgarðurinn einnig tekið á móti fjölmörgum hópum frá stofnunum, félagasamtökum og ferðahópum (h)eldri borgara.
Hægt er að bjóða upp á mislangar fræðslugöngur á Þingvöllum en ekki síður móttöku í gestastofu, þar sem við höfum upp á að bjóða fyrirlestrasal sem rúmar 100 manns.
Þá er svo einnig hægt að taka á móti hópum inn á sýningu þjóðgarðsins Hjarta lands og þjóðar.
