Öxarárdalur

Öxarárdalur er tiltölulega stór dalur í Þingvallasveit. Hann liggur milli Búrfells og Botnssúlna og snýr þvert á landreksstefnuna. Efst í Öxarárdal er Myrkavatn og úr því rennur Öxará niður hann endilangan. Samhliða ánni, norðanmegin, liggur hin forna Leggjabrjótsleið.

Ónefndur heimildarmaður segir svo í ódagsettri örnefnaskrá Svartagils:

„Öxarárdalur (17) er norður af Fossabrekkum, nokkuð stór dalur, og eru þar mikil landgæði, ákaflega skjólsamt. Þar var slegið í gamla daga. Öxará (18) er fyrir vestan Öxarárdal, Súlnalækur (19) rennur úr Fossabrekkum í Öxará, töluverður lækur. Einhvers staðar norðan við Öxarárdal er hornmark Árnessýslu, Kjósarsýslu og Borg.“

Þorsteinn Bjarnason frá Háholti segir svo í ódagsettri örnefnaskrá sinni um afrétt Þingvallasveitar:

„Sunnan í Súlum er Öxarárdalur (48), þar eru upptök Öxarár (49).“

Guðmann Ólafsson, bóndi á Skálabrekku, segir svo í athugasemdum sínum við skrá um örnefni í afrétti Þingvallasveitar árið 1982:

„Um Öxarárdal liggur gamla leiðin um Leggjabrjót (65) milli Kjósar og Þingvallasveitar. Leggjabrjótur er á milli Súlna og Myrkavatns fyrir ofan Öxarárdal.“

Guðmann Ólafsson. (1982). Afréttur Þingvellinga. Athugasemdir og viðbætur [Guðrún Þóra Guðmannsdóttir skráði]. Örnefnastofnun Íslands.

Svartagil. (e.d.). [Heimildamaður ókunnur, Guðjón Friðriksson skráði]. Örnefnastofnun Íslands.

Þorsteinn Bjarnason. (e.d.). Afréttur Þingvallasveitar. Örnefnastofnun Íslands.

1. Botnssúlur
2. Búrfell
3. Leggjabrjótsleið
4. Myrkavatn
5. Öxará