Innan þjóðgarðsins er eingöngu leyfð köfun í tveimur gjám, Silfru og Davíðsgjá. Silfra er einn besti köfunarstaður á Íslandi og af mörgum talinn vera á heimsmælikvarða. Ástæðan er mikið skyggni í tæru grunnvatninu og stórfenglegt umhverfi Silfru.
Austar í þjóðgarðinum er Davíðsgjá. Gjáin er úti í vatni og þarf að synda nokkuð til að komast að henni. Gjáin er grunn nær landi en opnast eftir því sem farið er lengra út.
Kafarar verða að uppfylla reglur og skilyrði um búnað og réttindi til köfunar. Kafarar verða að hlíta öllum reglum um köfun og virða reglur um umgengni innan þjóðgarðsins. Kafarar verða að hafa þurrbúningaréttindi eða hafa minnst 10 þurrbúningakafanir á síðustu tveimur árum. Köfun í blautbúningi er ekki heimil. Ekki er leyft að kafa einsamall, stunda hellaköfun eða fara dýpra en 18 metra. Kafarar kafa alfarið á eigin ábyrgð og áhættu.
Skrá þarf allar kafanir og yfirborðskafanir sem farnar eru í Silfru, bæði kafanir á vegum einstaklinga sem og fyrirtækja. Við skráningu einstaklinga þarf að samþykkja ábyrgðaryfirlýsingu sem og greiða gestagjald.
Hægt er að skrá köfun hér á heimasíðunni. Einnig í Þjónustumiðstöðinni á Leirum og Gestastofunni á Haki. Athugið að þjóðgarðurinn útvegar ekki búnað til köfunar eða yfirborðsköfunar (snorkl).
Þolmarkagreining fyrir Silfru. Köfun og yfirborðsköfun í Þingvallaþjóðgarði. Vorið 2019 vann Efla skýrslu um þolmarkagreiningu fyrir Silfru í samstarfi við þjóðgarðinn á Þingvöllum.
Reglur og fyrirmæli
Hér má sjá reglur Þingvallanefndar og fyrirmæli Samgöngustofu vegna köfunar í Silfru:
- Reglur um köfun í þjóðgarðinum á Þingvöllum (yfirborðs- og djúpköfun).
- Reglur um gestagjald, m.a. vegna köfunar og fyrir yfirborðsköfun í Silfru.
- Samgöngustofa: Fyrirmæli vegna köfunar og yfirborðsköfunar í þjóðgarðinum á Þingvöllum.
- Mars 2017: Breyting á fyrirmælum vegna köfunar og yfirborðsköfunar í þjóðgarðinum á Þingvöllum nr. 165/2013.