Flekkuhóll í frumheimildum
Ásgeir Jónasson frá Hrauntúni segir svo í grein sinni Örnefni í Þingvallahrauni í Árbók Hins íslenzka fornleifafélags 1937–1939:
„Austan-frá Sláttubrekkum, norður-af Hellishæð, er Flekkuhóll (59); er hann stór um sig, með smáhólum og lautum, allt skógi og grasi vaxið. Norður af honum og Sláttubrekkum er Bruni (60) [...] Norðaustur-af Bruna eru Selhólar (61) tveir, annar með vörðubroti. Þeir eru rjett norður frá Flekkhól.“
Kristján Jóhannsson frá Skógarkoti, síðar bóndi á Gjábakka og Mjóanesi, svarar spurningalista (í kringum 1980–1984) sem starfsfólk Örnefnastofnunar samdi upp úr örnefnalýsingu Ásgeirs Jónassonar:
„28. Flekkuhóll eða Flekkhóll? Er vitað um tilefni nafnsins? Flekkuhóll er nokkuð breiður höfði í norður frá Hellishæð. Efst er klofinn klettur. Höfðinn vel gróinn, í norðaustur með honum sést vel fyrir gömlum götum, sem eru sunnan við Hellishæð og til Klukkustígs. Nafngiftin óljós.“
Pétur J. Jóhannsson frá Skógarkoti, síðar bóndi á Gjábakka og Mjóanesi, merkti Flekkuhól (ritháttur: Flekkhóll) inn á útprentaða loftmynd á 9. áratug síðustu aldar við núverandi staðsetningu.