Selhólar
Selhólar eru tveir hólar í hrauninu fyrir innan Bruna og Flekkuhól. Annar þeirra er auðkenndur með nokkuð heillegri vörðu á framanverðum toppnum og norðaustan hans er annar smærri hóll. Við austurhlið hólanna liggur Gapahæðagata á milli Skógarkots og Gapahæða, sem eru skammt innar í hrauninu.
Miklar líkur eru á að forn selstaða leynist í næsta nágrenni hólanna og útskýri nafngjöf þeirra. Hennar er án efa getið í sóknarlýsingu Þingvallaprestakalls 1840, þar sem sel frá Skógarkoti var merkt inn á handteiknað kort norðvestur af Sigurðarseli.
Selhólar í frumheimildum
Séra Björn Pálsson Þingvallaprestur merkir tvö sel í austanverðu Þingvallahrauni inn á handteiknað kort af Þingvallsveit í sýslu- og sóknarlýsingu sinni fyrir Hið íslenzka bókmenntafélag árið 1840. Það syðra er eignað Vatnskoti og merkt við barma Hrafnagjár; þar kemur heim við Sigurðarsel. Hitt selið er merkt norðvestur af því og eignað Skógarkoti; ábyggilega hefur verið átt við svæðið nálægt Selhólum.
Ásgeir Jónasson frá Hrauntúni segir svo í grein sinni Örnefni í Þingvallahrauni í Árbók Hins íslenzka fornleifafélags 1937–1939:
„Norðaustur-af Bruna eru Selhólar (61) tveir, annar með vörðubroti. Þeir eru rjett norður frá Flekkhól. Norðaustur-af þeim er Syðri-Gapahæð (62); snýr hún í suðaustur og norðvestur; er hún skógi vaxin að suðaustan, en skógarlítill að norðaustan.“
Kristján Jóhannsson frá Skógarkoti, síðar bóndi á Gjábakka og Mjóanesi, svarar spurningalista (í kringum 1980–1984) sem starfsfólk Örnefnastofnunar samdi upp úr örnefnalýsingu Ásgeirs Jónassonar:
„29. Hvernig eru Selhólar? Við hvaða sel eru þeir kenndir? Selhólar eru 2 velgrónir strýtumyndaðir hólar. Trúlega sel frá Hrauntúni.“
Heimildir
Björn Pálsson. (1979). Þingvalla- og Úlfljótsvatnssóknir. Í Árnessýsla. Sýslu- og sóknalýsingar Hins íslenzka bókmenntafélags 1839-1843 og lýsing Ölfushrepps anno 1703 eftir Hálfdán Jónsson (bls. 171–192). Sögufélag.
Pétur J. Jóhannsson. (e.d.). Þingvallaþankar og lýsing eyðibýla. Örnefnastofnun Íslands.