Vatnskot

Vatnskot
Vatnskot er hvort tveggja tjaldstæði og vinsæll veiðistaður. Þar er öll aðstaða til fyrirmyndar.

Í Vatnskoti á bökkum Þingvallavatns er lítið tjaldsvæði. Tjaldað er á gömlum túnum sem áður tilheyrðu býlinu. Einungis er heimilt að vera í tjöldum eða léttum tjaldvögnum sem hægt er að draga með handafli inn á svæðis.
Á svæðinu er snyrtihús með vatnssalernum, vöskum og köldu rennandi vatni. Einnig eru borð og bekkir til afnota fyrir gesti.
Á tjaldsvæðinu í Vatnskoti og í nágrenni þess er mikið af gömlum vegghleðslum og tóftarbrotum.

Tóftir

Vatnskot var lengi vel sel frá Þingvallabæ. Þar var svo búskapur frá síðari hluta 19. aldar fram yfir miðja 20. öld. Síðasti ábúandinn var Símon Pétursson. Enn sést vel fyrir tóftum gamla bæjarins. 

Símon var þúsundþjalasmiður og fann upp á ýmsum tækjum og tólum sem nýttust í fámennri og oft torsóttri sveitinni. Þingvallavatn þekkti hann út og inn enda var það eitt helsta lífsviðurværi hans það sem úr vatninu fékkst ásamt ýmissi vinnu m.a. fyrir þjóðgarðinn á Þingvöllum.