Ámundahólar

Ámundahólar (eða Ögmundarhólar) eru lágir og kjarrgrónir hólar í brekkunum norðaustan Tjarna. Mikill og djúpur götuslóði liggur úr vestri frá Klifhólum fram hjá Ámundahólum og greinist þar í tvo meginstrauma inn eftir Hábrún. Skammt frá Ámundahólum er Nýi-Stekkur og brekka sem heitir Skúti.

Ásgeir Jónasson frá Hrauntúni segir svo í grein sinni Örnefni í Þingvallahrauni í Árbók Hins íslenzka fornleifafélags 1937–1939:

„Skammt fyrir vestan Vellankötlu, vestan-við gamla veginn, en norðan-við hinn nýja, eru Tjarnir (33). Norðaustan-við þær eru Ámundahólar (34), að mestu grasi og skógi vaxnir. Austur-af þeim er Nýi-stekkur (35); hvaðan hann hefir verið notaður, er mjer ókunnugt um, en líklega hefir það verið frá Skógarkoti.“

Kristján Jóhannsson frá Skógarkoti, síðar bóndi á Gjábakka og Mjóanesi, svarar spurningalista (í kringum 1980–1984) sem starfsfólk Örnefnastofnunar samdi upp úr örnefnalýsingu Ásgeirs Jónassonar:

„Ámundahólar, (eru þeir margir, háir?). Ámundahólar eða Ögmundarhólar eru austur frá Tjörnum, ávalir og skógivaxnir 5 eða 6 alls.“

Pétur J. Jóhannsson frá Skógarkoti, síðar bóndi í Mjóanesi, merkti örnefnið (ritháttur: Ögmundarhólar) inn á útprentaða loftmynd á 9. áratug síðustu aldar við núverandi staðsetningu.

Ásgeir Jónasson. (1939). Örnefni í Þingvallahrauni. Árbók Hins íslenzka fornleifafélags 1937-1939, 147–161.

Kristján Jóhannsson. (e.d.). Örnefni í Þingvallahrauni. Svör við spurningum [Óbirt efni]. Örnefnastofnun Íslands/Þjóðgarðurinn á Þingvöllum.

Pétur J. Jóhannsson. (e.d.). Þingvallaþankar og lýsing eyðibýla. Örnefnastofnun Íslands.

1. Brún
2. Nýi-Stekkur
3. Skúti