Öryggisæfing við Silfru
Æft var að koma bretti að við uppstigið í Silfru
Guðmundur Hafsteinsson
Í dag var haldin öryggisæfing við Silfru. Höskuldur Friðriksson sjúkraflutningamaður HSU á Þingvöllum hélt námskeiðið fyrir starfsfólk þjóðgarðsins. Farið var í helstu þætti sem tengist búnaði sem sjúkraflutningamaður hefur meðferðis í bílnum og er til staðar á Silfru.
Áður en farið var út í snjókomuna fór Höskuldur yfir helstu þætti er varðar þann búnað sem til er.
Guðmundur Hafsteinsson
Silfra hefur verið einkar vinsæll viðkomu- og afþreyingastaður á Þingvöllum í rúman áratug. Gestir koma til að njóta einstakrar náttúru, tærleika vatnsins og ævintýrisins sem því fylgir að svamla í íssköldu vatninu.
Undanfarin ár hefur þjóðgarðurinn á Þingvöllum verið með samning við HSU um viðveru sjúkraflutningamanns á Þingvöllum. Er það liður í að auka öryggi gesta þjóðgarðsins. Þó alla jafna sé öruggt að kafa og yfirborðskafa í Silfru með góðri leiðsögn að þá er þó athæfið ekki með öllu hættulaust.
Æfingin er mikilvægur liður í að auka getu starsfsfólks þjóðgarðsins til að takast á við slys þegar þau verða.
Jukka Siltanen landvörður á Þingvöllum er reyndur kafari og skellti sér í hlutverk þess sem þarf að bjarga. Höskuldur sjúkraflutningamaður er við kuldabola öllu búinn.
Guðmundur Hafsteinsson
Vatnið í Silfru er allajafna um 3-4 gráður á Celcius. Það var þó ögn hlýrra en yfirborðshitinn sem var vel undir frostmarki og gekk á með éljum. Starfsfólk dúðaði sig því vel upp.
Æfingin sem fór fram í dag var haldin fyrst á svipuðum tíma í fyrra. Hún verður svo endurtekin fyrir næstu vakt svo allt starfsfólk sé með svipaða þjálfun. Þá fer að venju fram skyndihjálparnámskeið fyrir starfsfólk þjóðgarðsins í maí.
Það er að mörgu sem þarf að huga þegar gestakomur teljast einhversstaðar við 1,5 milljónir á ári. Skyndihjálparnámskeið, öryggisæfingar, starfsdagar og yfirferð á búnaði er allt liður í því að tryggja öryggi gesta eins og hægt er.