Gestastofa þjóðgarðsins á Þingvöllum er staðsett við Hakið ofan Almannagjár. Þar býðst gestum að fræðast um svæðið og starfsfólk þjóðgarðsins veitir ýmsar ráðleggingar um heimsóknina á upplýsingaborði.

Þar er einnig kaffi- og minjagripasala, salernisaðstaða, fjölnotasalur og sýningin Hjarta lands og þjóðar.

Stór útsýnispallur er fyrir utan gestastofuna, þar sem horft er yfir mestalla umgjörð Þingvalla. Þaðan er aðeins um nokkura mínútna ganga inn í hjarta þjóðgarðsins.

Hjarta lands og þjóðar er verðlaunuð margmiðlunarsýning í gestastofu þjóðgarðsins, þar sem helstu atriði í sögu og náttúru Þingvalla eru dregin fram á gagnvirkan hátt. 

Farið er yfir sögu alþingis á Þingvöllum og helstu störfum þess, auk mikilvægi staðarins fyrir samfélagið í tímans rás, allt frá söguöld til dagsins í dag. Einnig er fjallað um jarðfræði Þingvalla og flekaskilin, Þingvallavatn og lífríki svæðisins í heild sinni.

Kaupa miða á sýningu

Snorrabúð er fjölnotasalur í gestastofunni, sem dregur nafn sitt af frægri þingbúð Snorra goða Þorgrímssonar. Salurinn er oft opinn almenningi, þar sem myndefni frá þjóðgarðinum er varpað á stórt sýningartjald.

Salurinn hentar einnig vel fyrir ýmis konar athafnir, líkt og fyrirlestra og ráðstefnur, veisluhöld, vinnuhópa og margt fleira. Hægt er að leigja Snorrabúð eftir samkomulagi.

Nánari lýsingu á Snorrabúð má nálgast hér.

Ljósmyndasýningin Þingvellir 1944 var unnin af þjóðgarðinum á Þingvöllum í samstarfi við Þjóðminjasafn Íslands sumarið 2024, í tilefni af því að 80 ár voru liðin frá lýðveldisstofnun.

Íslenska lýðveldið var formlega stofnað á Lögbergi á Þingvöllum 17. júní 1944 og Sveinn Björnsson kjörinn fyrsti forseti þess, mánuði eftir að lýðveldisstofnun var samþykkt í þjóðaratkvæðagreiðslu með ríflega 97% greiddra atkvæða.

Ísland hafði þegar hlotið fullveldi 1918 og fengið flest málefni í sínar eigin hendur, nema utanríkismál, en tengsl við Danaríki rofnuðu þegar það var hernumið í apríl 1940.

Ákveðið var að lýðveldisstofnunin skyldi fara fram á Þingvöllum „hvernig sem viðraði“. Skipulagning hátíðarinnar var unnin rösklega, vegurinn yfir Mosfellsheiði var lagfærður og allar tiltækar hópbifreiðar fengnar til að ferja sem flesta til Þingvalla. Ríflega 1500 tjaldborgir voru reistar á völlunum efri, sem og sýningarsvið fyrir kórsöng, íþróttasýningar, glímu og margt fleira. Þá var þingpalli komið fyrir á Lögbergshallanum, þar sem alþingi var sett.

Stofnun lýðveldisins Íslands tók síðan gildi þegar klukkan sló tvö um eftirmiðdaginn þann sautjánda júní 1944. Þá var íslenski fáninn dreginn að húni og kirkjuklukkurnar hringdu í tvær mínútur. Ómur Íslandsklukkunnar barst um allt land í viðtæki landsmanna á einhverjum stærsta og merkilegasta viðburði sem átt hefur sér stað á Þingvöllum.

Í gangi inn af sýningunni okkar Hjarta lands og þjóðar sem staðsett er í gestastofu þjóðgarðsins er tímabundna ljósmyndasýningin Velkomin til Þingvalla. Hér fylgjum við eftir ferli ljósmyndarans Gunnars Geirs Vigfússonar sem nær yfir 50 ár. 

Gunnar hefur ljósmyndað þrjár stórhátíðir á staðnum, 1100 ára afmæli Íslandsbyggðar, 50 ára afmæli lýðveldis og kristnitökuhátíðina.

Af öðrum atburðum stendur upp úr heimsókn Jóhannesar Páls páfa II, Elísabetar II bretadrottningar og Jiang Zemin Kínaforseta og samþykkt Þingvalla á heimsminjaskrá Sameinuðu þjóðanna UNESCO árið 2004.

Á 50 árum hefur safnast í myndabanka Gunnars eftir því sem heimsóknum erlendra ráðamanna hefur undið fram. Sýningin er ferðalag um tímann þar sem umhverfi staðarins breytist lítið en ný andlit birtast á hverri mynd.

Sýningin „Hjarta lands og þjóðar“, sem staðsett er í gestastofu þjóðgarðsins á Þingvöllum hlaut tvenn Red Dot Design verðlun 2019. Sýningin fékk annarsvegar verðlaun fyrir „upplýsingahönnun” og hinsvegar fyrir „viðmótshönnun og notendaupplifun“. Sýningin hefur um 10 gagnvirkar stöðvar og býður hún upp á áhugaverða ferð í gegnum sögu Þingvalla og einstaka innsýn í náttúrufar staðarins þar sem öll skilningarvitin eru virkjuð.

Gestastofan á Haki hefur fullnaðarvottun BREEAM (Building Research Establishment Environmental Assessment Method). BREEAM er breskt umhverfisvottunarkerfi. Byggingin hefur fengið vottanir BREEAM bæði á hönnunartíma sem og eftir að byggingin reis.

Fullnaðarvottunin staðfestir að byggingin uppfyllir staðla um vistvæna hönnun samkvæmt alþjóðlega viðurkennda vottunarkerfinu BREEAM. Engar athugasemdir eða frávik komu fram og fékk Hakið þrjár stjörnur af fimm mögulegum og var endanlegt skor 59,9% - “Very Good" - eins og að var stefnt. EFLA þakkar Þjóðgarðinum á Þingvöllum og Framkvæmdasýslu ríkisins fyrir samstarfið og óskar þeim innilega til hamingju með vottunina. Í vottuninni er lagt mat á marga mismunandi þætti svo sem:

• Umhverfisstjórnun á byggingar- og rekstrartíma
• Góða innivist sem tekur m.a. til hljóðvistar, inniloftgæða og lýsingar
• Góða orkunýtni og vatnssparnað
• Val á umhverfisvænum byggingarefnum
• Úrgangsstjórnun á byggingar- og rekstrartíma
• Viðhaldi vistfræðilegra gæða nánasta umhverfis
• Lágmörkun ýmis konar mengunar frá byggingu t.d. er varðandi frárennsli og ljósmengun

Markmið BREEAM vistvottunar er að hanna og byggja byggingar sem hafa minni umhverfisáhrif, eru heilsusamlegri fyrir notendur og þurfa minna viðhald en hefðbundnar byggingar.

Nánar má lesa um úttetkinga í pdf skjali.