Stórkonugil

Stórkonugil er stórt gil í austanverðu Ármannsfelli. Það er myndað af leysingavatni og nær frá gígbarmi fellsins alla leið niður að fjallsrótunum. Framburður úr gilinu hefur átt drjúgan þátt í að mynda Hofmannaflöt, austan og norðaustan gilsins, sem og Víðivelli nokkuð sunnar. Örnefnið Vopnalág hefur verið merkt norðan í gilsmynninu og sunnan þess má finna örnefnið Sláttubrekku.

Engar sögur fylgja stórkonunni, þ.e.a.s. tröllskessunni, sem gilið mun vera kennt við.

Kristján Jóhannsson frá Skógarkoti, síðar bóndi á Gjábakka og Mjóanesi, segir svo í örnefnaskrá sinni um Hrauntúnsland og afrétti Þingvallahrauns sem rituð var í kringum 1980–1985:

„Stórkonugil (5) er í vestur frá Hofmannaflöt, djúpt og dimmt, sker fjallið upp á brún. Framar og vestar kemur brekka sem kölluð var Sláttubrekka (6).“

Þorsteinn Bjarnason frá Háholti segir svo í ódagsettri örnefnaskrá sinni um afrétt Þingvallasveitar:

„Suðaustan í Ármannsfelli er Stórkonugil (22). Austan undir fjallinu er Hofmannaflöt (23).“

Pétur J. Jóhannsson frá Skógarkoti, síðar bóndi í Mjóanesi, merkti Stórkonugil inn á útprentaða loftmynd á 9. áratug síðustu aldar við núverandi staðsetningu.

Kristján Jóhannsson. (e.d.). Örnefni í Hrauntúnslandi og afrétti Þingvallahrauns [Óbirt efni]. Örnefnastofnun Íslands/Þjóðgarðurinn á Þingvöllum.

Pétur J. Jóhannsson. (e.d.). Þingvallaþankar og lýsing eyðibýla. Örnefnastofnun Íslands.

Þorsteinn Bjarnason. (e.d.). Afréttur Þingvallasveitar. Örnefnastofnun Íslands.

1. Ármannsfell
2. Hofmannaflöt
3. Sláttubrekka
4. Vopnalág