Arnarsetur
Arnarsetur er klettur á norðanverðu Arnarfelli ofan Einbúa, á rana sem gengur til norðurs úr fellinu. Nafnið er dregið af haförnum sem sagðir eru hafa verpt í klettinum fram yfir aldamótin 1900 en þessi meinti hreiðurstaður er nú löngu aflagður. Nákvæm staðsetning Arnarkletts á fjallsrananum liggur ekki fyrir en núverandi hnitsetning mun vera nokkuð nærri lagi.
Arnarsetur í frumheimildum
Örnefnið er ritað Arnarþúfa (Arnarthúfa) á korti bandaríska hersins (U.S. Army Map Service) frá 1949 og hefur sú nafnmynd haldist á sumum kortum enn þann dag í dag. Örnefnið er þar merkt við núverandi hnitsetningu.
Kristján Jóhannsson frá Skógarkoti, síðar bóndi á Gjábakka og Mjóanesi, segir svo í örnefnaskrá Arnarfells frá 1982:
„Þegar Innri-Sandskörðum sleppir, hækkar [Arnarfell], og þar gengur rani úr því til norðurs. Á honum er klettur, sem heitir Arnarsetur (23). Norðaustur af þessum rana er nes, sem gengur út í vatnið. Á því er stakur móbergsklettur, sem heitir Einbúi (24).“
Kristján segir þá í svari við spurningalista (í kringum 1982–1985) sem starfsfólk Örnefnastofnunar samdi upp úr örnefnaskrá Arnarfells:
„8. Er vitað til þess, að örn hafi verpt í Arnarsetri? Fram yfir síðustu aldamót.“
Pétur J. Jóhannsson frá Skógarkoti, síðar bóndi í Mjóanesi, merkti Arnarsetur inn á útprentaða loftmynd á 9. áratug síðustu aldar. Arnarsetur var þar mjög sunnarlega á fellinu, austan-í kjarrtorfu milli Fjallshorns og Bekkja (64.21182,-21.0793).