Möngudalur

Möngudalur er laut í austanverðu túninu í Skógarkoti. Hún er hringlaga, um tuttugu metrar í þvermál og um tveggja metra djúp. Í botni hennar safnaðist vatn oft að vetri til. 

Ekki er vitað um uppruna nafnsins.

Ásgeir Jónasson frá Hrauntúni segir svo í grein sinni Örnefni í Þingvallahrauni í Árbók Hins íslenzka fornleifafélags 1937–1939:

„Í túninu suðaustur-af [Skógarkotsbænum] er djúp laut, er Möngudalur (138) heitir.“

Kristján Jóhannsson frá Skógarkoti, síðar bóndi á Gjábakka og Mjóanesi, svarar spurningalista (í kringum 1980–1984) sem starfsfólk Örnefnastofnunar samdi upp úr örnefnalýsingu Ásgeirs Jónassonar:

„57. Er vitað um tilefni nafnanna Möngudalur? Möngudalur er eldra nafn en við höfum hugmynd um. Hann er alldjúpur en vel gróinn og var oft vatn í honum að vetri til, notað handa fénaði.“

Pétur J. Jóhannsson frá Skógarkoti, síðar bóndi á Gjábakka og Mjóanesi, merkti Möngudal inn á útprentaða loftmynd á 9. áratug síðustu aldar við núverandi staðsetningu.

Ásgeir Jónasson. (1939). Örnefni í Þingvallahrauni. Árbók Hins íslenzka fornleifafélags 1937-1939, 147–161.

Kristján Jóhannsson. (e.d.). Örnefni í Þingvallahrauni. Svör við spurningum [Óbirt efni]. Örnefnastofnun Íslands/Þjóðgarðurinn á Þingvöllum.

Pétur J. Jóhannsson. (e.d.). Þingvallaþankar og lýsing eyðibýla. Örnefnastofnun Íslands.

1. Skógarkot