Hrútabrekkur
Hrútabrekkur eru grónar brekkur fyrir suðaustan Skógarkot. Þær eru staðsettar vestan í aflöngum hól upp við gamla sýsluveginn um Þingvallahraun, skammt fyrir ofan örnefnin Leiti og Lágubrún. Skógarbletturinn vestan við Hrútabrekkur kallast Hrútabrekkuskógur.
Hrútabrekkur í frumheimildum
Ásgeir Jónasson frá Hrauntúni segir svo í grein sinni Örnefni í Þingvallahrauni í Árbók Hins íslenzka fornleifafélags 1937–1939:
„Að norðvestan við Lágbrún er ávalur jafn halli að henni, sljettur að ofan, sem heitir Leiti (122); nær það frá Stekkjarvörðubölum með Lágbrún að Hrútabrekkum (123), sem eru vestan í löngum grjóthól frá norðri til suðurs, austan vegarins.“
„Vestur-að Hrútabrekkum, að Sauðasteinum, heitir Hrútabrekkuskógur (130).“
„Rjett fyrir ofan Hrútabrekkur er brött klöpp í veginum, sem heitir Pelahella (133).“
Pétur J. Jóhannsson frá Skógarkoti, síðar bóndi á Gjábakka og Mjóanesi, merkti Hrútabrekkur inn á útprentaða loftmynd á 9. áratug síðustu aldar við núverandi staðsetningu.