Magnúsarklettsskógur
Magnúsarklettsskógur er skógarblettur í Þingvallahrauni, sem dregur nafn sitt af Magnúsarkletti í honum miðjum.
Skógurinn, sem var m.a. notaður til eldiviðar frá Skógarkoti, er nokkurn veginn ákvarðaður við Strýtuhóla og Mosalág í suðri, skammt ofan Þingvallavegar. Mörkin í austri eru við Músarhóla og Bruna og í norðri nær skógurinn inn að Smalavörðu við samnefnda brún, þar sem skógarlítið og mosavaxið svæði tekur við. Mörkin í vestri eru óskilgreind.
Djúpar götur eru víða í Magnúsarklettsskógi. Ein þeirra liggur inn í skóginn úr suðvestri frá Skógarkoti, tvístrast þar í tvo meginstrauma og liggur svo áleiðis inn að Gapahæðum. Aðrir greinilegir slóðar liggja til norðurs um skóginn inn að Stórhólum og Þorsteinsvörðu. Ekki er þó hægur leikur að ganga eftir þessum götum, því skógurinn er í mikilli sókn. Trjábolurinn á einni birkiplöntunni mældist 120 sentimetrar að ummáli haustið 2025 og tréð sjálft mun vera yfir fimm metra hátt, sem er yfir fimmföld meðalhæð birkiplantna í Þingvallaskógi um aldamótin 1900.
Magnúsarklettsskógur í frumheimildum
Ásgeir Jónasson frá Hrauntúni segir svo í grein sinni Örnefni í Þingvallahrauni í Árbók Hins íslenzka fornleifafélags 1937–1939:
„Mosalág er laut stór eða dalur norðan-undir Höfðum, vestan-undir Sláttubrekkum. Norðan-við hana heitir Magnúsarklettsskógur (57). Vestan-við hana er Mosalágarhæð (58), stór grjótbali, sem snýr h.u.b. í norður og suður.“
„Góðan kipp austur frá Skygni er hæð lítil, sem snýr frá norðri til suðurs, með brekku vestan-í, sem heitir Sand-„Gíslahæð“ (147) [...] stutt fyrir austan hana eru strýtumyndaðir smáhólar, sem heita Strýtuhólar (149). Þar fyrir austan tekur við áður-nefndur Magnúsarkletts-skógur með Mangúsarkletti (150) h.u.b. í miðju; er það nokkuð hár, sjerstakur hraunklettur; nær skógur þessi í austur að smá-hólum, sem heita Músarhólar (151); eru þeir rjett fyrir norðan áður-nefndan neðri eða vestur-enda á Bruna [...]“
Kristján Jóhannsson frá Skógarkoti, síðar bóndi á Gjábakka og Mjóanesi, svarar spurningalista (í kringum 1980–1984) sem starfsfólk Örnefnastofnunar samdi upp úr örnefnalýsingu Ásgeirs Jónassonar:
„27. Er Magnúsarklettsskógur stór. Hvar er Magnúsarklettur sá, er skógurinn dregur nafn af? Er vitað um tilefni nafnsins? Hvernig var skógurinn nýttur þarna í hrauninu? Hefur gróðurfar breytzt þar á síðari árum, t.t.v. með tilkomu Þjóðgarðsins? Magnúsarklettsskógur liggur norðan við Mosalág. Nær að Músarhólum, nær að Smalavörðu hún í vestur að nýja þjóðgarðsveginum. Notaður til eldiviðar frá Skógarkoti. Lágskógur hefur þéttst.“
Pétur J. Jóhannsson frá Skógarkoti, síðar bóndi á Gjábakka og Mjóanesi, merkti Magnúsarklettsskóg inn á útprentaða loftmynd á 9. áratug síðustu aldar við núverandi staðsetningu (64.26865,-21.0418).