Réttarhóll
Réttarhóll er nafn á hæsta hluta Sjónarhóls fyrir ofan eyðibýlið Skógarkot. Nafnið er líklegast dregið af fjárréttum skammt austar. Norðvestan við hólinn, utan túnsins, er örnefnið Réttarholt.
Réttarhóll er þríklofinn og þar eru djúpar, botngrónar sprungur með grjóthleðslum á stöku stað. Túngarðurinn í Skógarkoti er hlaðinn upp við sprungubarmana, og þar má einnig finna leifar af landmælingastaur frá 7. áratugi 20. aldar.
Annar hóll með sama nafni er í landi Gjábakka og enn annar í landi Brúsastaða.
Víðmynd af Skógarkoti, séð frá Réttarhóli.
Þjóðgarðurinn á Þingvöllum
Horft inn eftir stærstu sprungunni á Réttarhól. Glöggt má greina fyrirhleðslur við báða enda hennar. Landmælingastaur í bakgrunni.
Þjóðgarðurinn á Þingvöllum
Tvískipt fjárrétt austan í Réttarhól. Túnið í Skógarkoti mun hafa verið stækkað á fyrri hluta 20. aldar og þá lenti réttin innan þess.
Þjóðgarðurinn á Þingvöllum
Réttarhóll í frumheimildum
Ásgeir Jónasson frá Hrauntúni segir svo í grein sinni Örnefni í Þingvallahrauni í Árbók Hins íslenzka fornleifafélags 1937–1939:
„[Skógarkotsbærinn] stendur sunnan í hæð, sem nefndur var Balinn (140); uppi á honum voru fjárhús og heyhlöður. Þar, sem hann er hæstur, er sundurklofinn hóll, sem heitir Rjettarhóll (141). Austan-við hann, norðan-við túngarðinn, var fjárrjett, og austan-við túnið tvö lambhús; nú er allt þetta óþarft orðið.“
Pétur J. Jóhannsson frá Skógarkoti, síðar bóndi á Gjábakka og Mjóanesi, merkti Réttarhól inn á útprentaða loftmynd á 9. áratug síðustu aldar við núverandi staðsetningu.