Prestahraun
Prestahraun er úfin hraunbreiða sem telst hluti af Þjófahrauni. Prestahraun hefur runnið ofan af Tindaskagaheiði fyrir ríflega þrjú þúsund árum, flætt yfir norðanverða Hlíðargjá nálægt Prestastíg og staðnæmst við Brúnkolluhöfða og Höfðaskóg skammt vestar.
Mögulega hefur hluti af hinum forna Hrafnabjargavegi legið yfir Prestahraun á milli Prestastígs og Víðivalla. Þjóðgarðsgirðingin í norðanverðu Þingvallahrauni liggur þá yfir Prestahraun.
Prestahraun í frumheimildum
Ásgeir Jónasson frá Hrauntúni segir svo í grein sinni Örnefni í Þingvallahrauni í Árbók Hins íslenzka fornleifafélags 1937–1939:
„Að vestan og norðan við Gapahæðir eru flatir hellubalar, mosavaxnir, með lautum og slökkum, og skógarrunnum og hríslum í brúnunum, nema á litlu svæði norður-með Raftahlíð eða Hlíðargjá, sem getur fremur heitið heiði eða móar allt norður að Prestahrauni (83). Það er nokkuð stór brunahraunsblettur með skörpum brúnum. [...] Norður-af Gapahæðum, fyrir norðan áður-nefnda mosabala, eru lítið áberandi hæðir, sem snúa h.u.b. í austur og vestur. Þær heita Einiberjahæðir (85). Þar fyrir norðan, og vestan Prestahraun, heitir Höfðaskógur (86); hallar honum lítið eitt mót suðri.“
Kristján Jóhannsson frá Skógarkoti, síðar bóndi á Gjábakka og Mjóanesi, svarar spurningalista (í kringum 1980–1984) sem starfsfólk Örnefnastofnunar samdi upp úr örnefnalýsingu Ásgeirs Jónassonar:
„37. Er vitað um tilefni nafnanna Raftahlíð, Prestahraun (hvar er það), Brúnkolluhöfði? Gjáin, sem lýst er í sp. 35, heitir mörgum nöfnum. Undir vestari barmi hennar er, fremst innan við Gildruholt, Hlíðarfláar vel grösugir og hefur verið all mikill skógur þar. Svo kemur Hlíðarharun innan við það heitir Raftviðarhlíð og innar Prestastígur. Vestan við Prestastíg er úfið hraun, mikið mosavaxið, Prestahraun og nær að Brúnkolluhöfða.“
Pétur J. Jóhannsson frá Skógarkoti, síðar bóndi á Gjábakka og Mjóanesi, merkti Prestahraun inn á útprentaða loftmynd á 9. áratug síðustu aldar við núverandi staðsetningu.